BIBLIYA YA MASHI (bunyibunyi)

Mashi Bible in Word document
https://app.zohocreator.eu/pierrematabarochubaka/mashi-bible/#Report:Omurhondero_Report

OMURHONDERO I 1. Aha murhondero Nnâmahanga alema amalunga n’igulu. 2. Igulu lyali cimpirimpiri-civange lirhaligwerhe oku liyosire lirhanalimwo bici ci Muuka gwa Nnâmahanga akag’iyereera oku mishi. 3. Nnâmahanga aderha, erhi: « Obulangashane bube ». Obulangashane bwanaciba. Nnâmahanga abona oku obulangashane buli bwinja. Anaberula obulangashane n’omwizimya. 5. Ayirika obulangashane muushi n’omwizimya aguyirika budufu. Bwayira bwanaca, lwo lusiku lurhanzi. 6. Nnâmahanga aderha, erhi:  » Ecireere cibe aha karhi k’amishi ciberule amishi n’amashi. 7. Nnâmahanga ajira ecireere caba lubibi lw’amishi gali idako n’agali enyanya ly’ecireere. Byanaciba ntyo. 8. Nnâmahanga ayirika ecireere malunga. Bwayira bwanaca, lwo lusiku lwa kabiri. 9. Nnâmahanga aderha, erhi: « Amishi gali idako ly’ecireere gacigushe haguma n’ahakazire habonekane ». Byanaciba ntyo. 10. Nnâmahanga ayirika ahakazire budaka n’ecirundo c’amishi aciyirika nyanja. Nnâmahanga abona oku kuli kwinja. 11. Nnâmahanga aderha, erhi: « Obudaka bumerekwo olubala lulimwo emburhu, ngasi luguma kushimbana n’omwanya gwalo n’emirhi y’amalehe, era emera oku idaho enaleheke n’obujuru bwayo, ngasi muguma kushimbana n’omwanya gwagwo. Byanaciba ntyo. Idaho lyamerakwo olubala lubamwo olujuru, ngasi luguma kushimbana n’omwanya gwalwo n’emirhi eleheka n’olugemu kushimbana n’omwanya gwayo. Nnâmahanga abona oku kuli kwinja. 13. Bwayira bwanaca, lyo lusiku lwa kasharhu. 14. Nnâmahanga aderha, erhi: « Ebimole bibe omu cireere c’emalunga lyo biberula omuushi n’obudufu; byaba bimanyiso by’empondo n’ecanda, ensiku n’emyanka, 15. binabe bimole bimanike emalunga bya kumolekera igulu ». Byanaciba ntyo: 16. Nnâmahanga ajira bimole bibiri binene, ecimole cinenene mpu cikamoleka muushi, n’ecimole cinyinyi mpu cikamoleka budufu, boshi n’enyenyezi. 17. Nnâmahanga abimanika omu cireere c’emalunga mpu bikamolekera igulu, 18. mpu binamanyise omuushi n’obudufu n’okuberula obulangashane n’omwizimya. Nnâmahanga abona oku kuli kwinja. 19. Bwayira bwanaca, lwo lusiku lwa kani. 20. Nnâmahanga aderha, erhi: « Amishi gadudusemwo ebizine n’ebinyunyi bibalale enyanya ly’igulu, embere z’ecireere c’amalunga ». 21. Nnâmahanga alema abasimba banenene b’omu nyanja na ngasi bizine biyandala n’ebidudusa omu mishi, kushimbana n’omwanya gwabyo na ngasi rhunyunyi rhujira ebyubi kushimbana n’omwanya gwarhwo. Nnâmahanga abona oku kuli kwinja. 22. Nnâmahanga abigisha erhi: « Muyololoke, muluge, mubumbe nyishi n’enyanja; n’ebiyunyi bilunge okw’igulu ». 23.Bwayira bwanaca, lyo lusiku lwa karhanu. 24. Nnâmahanga aderha, erhi: « Obudaka buvuulule ebizine bya ngasi lubero: ensimba, ebiyandala n’ensimba z’erubala za ngasi lubero ». Byanaciba ntyo. 25. Nnâmahanga alema ensimba z’erubala za ngasi lubero n’ebishwekwa bya ngasi lubero n’ebiyandala oku idaho bya ngasi lubero. Nnâmahanga abona oku kuli kwinja. 26. Nnâmahanga aderha, erhi: « Rhujire omuntu orhushusha, orhugwerheko ecikebo, yewarhambula enfi z’omu nyanja n’orhuyunyi rhw’emalunga, ebishwekwa n’eby’erubala byoshi, n’ebiyandala byoshi binadudusa oku igulu. 27. Nnâmahanga alema omuntu omushusha: oku nshusho ya Nnâmahanga amulemire, amulema mulume n’omukazi. 28. Nnâmahanga abagisha anababwira, erhi: « Muburhe muluge, mubumbe igulu, mulirhambule munarhegeke enfi z’omu nyanja n’orhunyunyi rhw’emalunga, na ngasi cizine cigera oku Idaho. 29. Nnâmahanga ashubiderha, erhi: « Loli oku mmuhire ngasi lubala lujira olujuru lunali uku igulu na ngasi murhi guleheka gunajira olujuru byo byaba biryo binyu. 30. Olubala nkana byo biryo mpire ngasi c’erubala, ngasi kanyunyi k’emalunga, ngasi cigera oku idaho cinayisa omuka. Byanaciba ntyo. 31. Nnâmahanga abona oku ebi anajiraga biri binja bwenene. Bwayira bwanaca, lwo lusiku lwa kalindarhu.

OMURHONDERO II 1. Ntyo amalunga n’igulu byashwinjwa n’ebimuba byoshi. 2. Obwo Nnâmahanga ashwinja omukolo akag’ijira analuhuka omu lusiku lwa kali nda omu mikolo yage yoshi. 3. Nnâmahanga agisha olusiku lwa kalinda analugoshola (aluhalira), bulya lyo aluhuukagamwo oku ngasi mukolo ajizire omu kulema. 4a. Yo nkomoka y’amalunga n’igulu eyo erhi bilemwa. 4b. Erhi Nyakasane Nyamuzinda ajira igulu n’amalunga, 5. nta ishaka yaliciba en’igulu, nta lubala lwalilucimera – bulya Nyakasane Nyamuzinda arhaliciniesa enkuba en’igulu na ntaye walicihinga obudaka 6.erhi okuhuluza amishi omu mibunda y’okudomerera obudaka-; 7.Nyakasane Nyamuzinda abumba omuntu n’akatulo k’oku idaho , amubuhira omuka gw’obuzine omu mazulu, ntyo nnamutu ahinduka ciremwa cizine. 8. Obwo Nyakasane Nyamuzinda arhwera ishwa ly’amalehe e Eden, ebushoshokero, ahiramwo omuntu abumbaga. 9. Nyakasane Nyamuzinda ameza oku budaka emirhi ya ngasi buko, yakusimisa isu na minja okulibwa, yalimwo omurhi gw’obuzine aha karhi k’ishwa n’omurhi gw’okumanya aminja n’amabi. 10. Kurhenga omu Edeni (ishwa ly’amasima) olwishi lwakag’ihulula lwaj’idomerera ishwa, lwakacigabamwo kani lushube nyishi ini. 11. Olwishi lurhanzi ye Pishone, luhulula luzunguluke ecihugo ca Avila, era munda eba amasholo, 12 n’amasholo g’eyo garhahimwa kuyinjiha, eyo eba n’obuku bubanya bwinja n’ibuye lyo onice. 13. Olwishi lwa kabiri luderhwa Gihone: luhulula luzunguluke ecihugo ca Etiopiya. 14. Olwishi lwa kasharhu luderhwa Tigri: luhulula ebushohokero bwo Asuru. Olwishi lwa kani luderhwa Eufrate. 15. Nyakasane Nyamuzinda orhola olya muntu amuhira omu ishwa lya Edeni, mpu akalihinga analilange. 16. Nyakasane Nyamuzinda aha omuntu eri irhegeko: « Wanalyo oku ngasi murhi guli omu ishwa, 17. ci omurhi gw’okumanya aminja n’amabi orhahìraga okagulyakwo, bulya amango wacishomya wagulya erhi onafire ». 18. Nyakasane Nyamuzinda aderha, erhi: « Kurhali kwinja omuntu ayorhe yene, rhumujirire omurhabazi omushushire ». 19. Nyakasane Nyamuzinda arhola obudaka abumbamwo ngasi nsimba y’erubala n’ebinyunyi by’emalunga byoshi, abihekera omuntu mpu alole kurhi abiyirika: ngasi oku omuntu abiyirikaga kwo byanayirisirwe. 20. Ntyo omuntu ayirika ebishwekwa byoshi, orhunyunyi rhw’emalunga rhwoshi n’ensimba z’erubala, ci omuntu arhabonagamwo murhabazi omushushire. 21. Nyakasane Nyamuzinda arhogezakwo omuntu iro ly’enkwira, nnamuntu ahunira; amushugula omurhibadu ashosha eminyafu aha omurhibadu gwarhengaga. Ogwo murhibadu Nyakasane Nyamuzinda ashugulaga oku mulume atulamwo omukazi anamulerhera omulume. 23. Nnamulume, erhi: « Lero oyu ye munyafu gw’omunyafu gwani na kavuha k’orhuvuha rhwani. Ayish’ikaderhwa mukazi (isha) bulya omu mulume (ish) arhenzire » (Ayish’ikaderhwa muka-mulume bulya omu mulume arhenzire). 24. Co cirhuma omulume akwanine aleke ishe na nnina acishwekerekwo mukage n’oku bali babiri bahinduke mubiri muguma (bayish’ihinduka muguma).

OMURHONDERO III 1. Enjoka yo yali nsimba nyenguuza omu nsimba z’erubala zoshi Nyakasane Nyamuzinda ajiraga. Wanjoka abwira omukazi, erhi: Ka kwo kunali Nnâmahanga aesire: Murhahìraga mukalya oku murhi ciru n’omuguma gw’omu ishwa? ». 2. Nnamukazi ashuza wanjoka, erhi: « Rhwanalya amalehe g’emirhi eri omu ishwa, 3. ci amalehe g’omurhi guli aha kagarhi k’ishwa gwoki, Nnâmahanga adesire: murha galyakakwo, ciru murhaguhumagakwo bulya erhi kufa munafire ». 4. Ci wanjoka abwira nnamukazi, erhi: « Nanga murhakafa mâshi! 5. Kali ciru Nnâmahanga amanyire oku amango mwagulyekwo amasu ginyu ganayiguke munahinduke nka Nnâmahanga mukamanya aminja n’amabi ». 6. Lero nnamukazi abona nk’omurhi guli mwinja okulibwa, gunali gwakusimisa amasu gunali gwa kucifinjwa n’okukululamwo obwenge; arhola irehe alyako, anaha iba wali bonaye, naye alyakwo. 7. Erhi amasu gabo bombi gayiguk,a babona oku bali bashugu; bazingazinga ebyasi by’omulehe babiyambalira omu cibunu. 8. Banaciyumva Nyakasane Nyamuzinda aja acigezageza omu ishwa oku hihusi hy’olusiku, omulume na mukage bacifulika Nyakasane Nyamuzinda, omu karhi k’emirhi y’omu ishwa. 9. Ci Nyakasane Nyamuzinda ayakuza omulume amubwira, erhi: « Ngahi oli? ». 10. Ashuza, erhi: « Nayumvirhe wadunda amashando omu ishwa, namayoboha, bulya ndi mushugunu co carhumire nacifulika ». 10. Ashub’idosa, erhi:  » Ndi wakumanyisize oku oli mushugunu? Ci akaba walire kwa gulya murhi nakuhanzagya nti irhondo orhahìraga okalya? » 11. Nnamulume ashuza, erhi: « Omukazi wampebaga aha burhambi anampire kwa gulya murhi nani namanalyakwo ». Nyakasane Nyamuzinda abwira omukazi, erhi : « Bici ebyo wamajira wani? ». Nnamukazi ashuza, erhi: « Kali enjoka yamanteba lero namalya ». 14. Go mango Nyakasane Nyamuzinda abwizirage enjoka, erhi:  » Obwo wanajizire ntyo, oheherirwe kulusha ngasi cishwekwa na kulusha ensimba z’erubala zoshi; oku nda okola wakagendera na katulo okola wakalya ensiku zoshi z’akalamo kawe. 15. Nkola naheba enshombo ekarhi kawe n’omukazi, ekarhi k’iburha lyawe n’iburha lyage: oyu akusinaga irhwe nawe omukomolere oku kansisira ». 16. Abwira nnamukazi, erhi:  » Nkolanayushula amalumwa gawe, n’amazimi gawe omu malumwa okola wakaburha abana. Kulalikira okolaga wakalalikira balo, ci naye akola ayish’ikakuzidohera. 17. Abwira nnamulume, erhi: « Obwo wayumvirhe mukawe, wanalya kuli gulya murhi, n’obwo nakurhegekaga, nti irhondo orhahìraga okagulyakwo, idaho liheherirwe erhi werhuma. Omu malibuko okola wakakulamwo eci walya, ensiku zoshi z’akalamo kawe. Mahwa n’emishugi likola lyakakufulukiza, okalya n’enshogo lubala. Kurhubanukirwa emalanga okola wakabonamwo omugati (biryo): kuhika oshubire omu budaka bulya mwo warhengaga. Oli katulo n’omu katulo washubire! ». 20. Omuntu ayirika mukage erya Eva, Hawa bulya ye nnina wa abazine boshi. 21. Nyakasane Nyamuzinda ajirira omulume n’omukazi ebishuli by’empu abayambika. 22. Nyakasane Nyamuzinda aderha, erhi: « Alagi oku omuntu akola ali ak’ìrhu erhi kumanya aminja n’amabi kurhuma. Mumanyage, arhag’ilambula okuboko arhanacirhole oku murhi gw’obuzine, agulye alame ensiku zoshi! ». 23. Nyakasane Nyamuzinda amuhimva omu ishwa lya Eden (masima), mpu ly’agend’ihinga obudaka arhengagamwo. 24. Ahimva omuntu anahira bakerubini n’engulumira y’engorho yalaza ebushoshokero bw’ishwa ly’amasima, lyo balanga enjira eja ebwa murhi gw’obuzine (lyo bahagalika omuntu arhahume oku murhi gw’obuzine).

OMURHONDERO IV 1. Adamu ashamuka kuli mukage Eva. Eva ayalala anaburha Kayini. Aderha, erhi: « Namashoboola omuntu emwa Nyakasane ». 2. Ashub’iburha omulumuna Abeli. Abeli ali mushwesi wa bishwekwa ci Kayini ali muhinzi wa budaka. 3. Erhi kugera mango, Kayini arhuula nterekero emwa Nyakasane ebi akulaga omu budaka, Abeli naye arhuula ababurhwa barhanzi b’ebibuzi byage n’amashushi gabyo. Nyakasane ayankirira Abeli n’entuulo yage, ci arhayankiriraga Kayini n’eyage ntuulo. Kayini akunirira okwo n’obusu bwage bwaforhama. 6. Nyakasane abwira Kayii, erhi: « Cirhumire wakunira, cirhumire obusu bwawe bwaforhama? 7. Nkawal’ijizire bwinja, karhinga orhayinamwiri amalanga. Ci akaba orhajiziri bwinja, ecaha cishurhamire aha luso lwawe, ciri cakulalira, ci ocihangane ocihime ». 8. Kayini abwira omulumuna Abeli, erhi: « Rhje ebulambo! ». Oku bali omu bulambo, Kayini ayinamula okuboko acirhulirakwo Abeli anamuniga. 9. Go mango Nyakasane abwizire Kayini, erhi: « Ngahi mulumuna wawe Abeli ali? ». Ashuza, erhi: »Ntamanyiri. Ka nien mmulanga mulumuna wani? ». 10. Amushoza, erhi: « Bici ebi wamajira? Izu ly’omuko gwa mulumuna wawe gwamanyakuza kurhenga okw’idaho.11. Buyorhe buheherirwe obudaka bwamiraga omuko gwa mulumuna wawe erhi werhuma. 12. Erhi okacihinga obudaka burhakacikuyerera bici, waba ntarhinda na karhebera omu igulu ». 13. Kayini abwira Nyakasane, erhi: « K’ecaha cani ciri cinene bwenene cirhakababalirwa? ». 14. Lola oku wamampiva muli lino ishwa nnangwasirwe ncifulike hali na nawe; nkolaga naba karharhinda na karhebera muno igulu, owanambugane hali amango akanyirha ». 15. Ci Nyakasane amubwira, erhi: « Ci kwoki ngasi wayirhe Kayini aciholwa kali nda! ». Nyakasane ahirakwo Kayini ecimanyiso. mpu lyo ngasi wamurhimane arhamushurhaga. 16. Kayini aciyegula kuli Nyakasane anayubaka omu cihugo ca Nodu, ebushoshokero bw’ishwa ly’amasima. 17. Kayini ashamuka bona mukage, mukage ayalala anaburha Enoku; ayubaka ecishagala aciyirika erya Enoku, cirhenzire oku izino ly’omugala. 18. Enoku aburhirwa Iradi, Iradi aburha Mekuyael na Mekuyael aburha Metuzael. Metuzael aburha Lamek, 19. Lamek arhola bakazi babiri: muguma ye Ada n’owundi ye Zila. 20. Ada aburha Yabal: y’ishe w’abahanda omu bifumba bajabalusa ebishwekwa. 21. Omulumuna yewali Yubal: yewali ishe w’abaziha olulanga n’akarhera. 22. Zila naye aburha Tubalkayini, mutuzi, y’ishe w’abakola amarhale n’ebyuma. Mwali wabo Tubalkayini yewali Nahama.
23. Lamek abwira bakage, erhi:  » Ada na Zila, yumvirhizi izu lyani; baka lameke, rhegi amarhwiri oku bino namubwira: nayisire omuntu okwenge amanyagaza nayirha n’omushikira okwenge amampukula. 24. Kalinda Kayini anaciholerwe ci Lamek yehe kali makumi gali nda na nda. 25. Adamu ashub’ishamuka bona mukage, nnamukazi aburha Set,  » bulya aderha, erhi: Nyamuzinda amanshoboza enyindi mwana ahali ha Abeli, bulya Kayini amuyisire ».
26. Set naye aburhirwa omugala, amuyirika erya Enosh. Go mango barhangiraga okucikumba YHWH, Nyakasane.

MURHONDERO V
V 1. Alaga ecitalbu c’emimo y’Adamu. Erhi Nnamahanga alema omuntu, amujira oku nshusho ya Nnamahanga; 2. mulume n’omukazi abalemire, abagisha anabayirika bantu erhi abalema. 3. Adamu al’igwerhe myaka igana na makumi asharhu, erhi aburha oku nshusho yage n’okucikebo cage, omugala anamuha izino lya Set. 4. Erhi ayus’iburha Seti, Adamu ashub’ilama myaka magana munani anaburha abagala n’abali.5. Akalamo k’Adamu koshi kali ka myaka magana mwenda na makumi asharhu, agal’ifa. 6. Set al’igwerhe myaka myaka igana n’irhanu erhi aburha Enosh. 7. Erhi aba amaburha Enoshi, Set ashub’ilama myaka magana munani na nda anaburha abagala n’abali. 8. Akalamo ka Set koshi kali ka myaka magana mwenda n’ikumi n’ibiri: agal’ifa. 9. Enoshi al’igwerhe myaka makumi gali mwenda erhi aburha Kenan; 10. erhi aba amaburha Kenan, Enosh ashub’ilama myaka magana munani n’ikumi n’irhanu, anashub’iburha abagala n’abali. 11. Akalamo ka Enosh koshi kali ka myaka magana mwenda n’irhanu; agal’ifa. 12: Kenan al’igwerhe myaka makumi gali nda erhi aburha Mahalaleel. 13. Erhi aba amaburha Mahalaleel. Kenan ashu’ilama myaka magana munani na makumi ani, anakaburha abagala n’abali. 14. Akalamo ka Kenan koshi kali ka myaka, agal’ifa. 15. Malahaleel aligwerhe myaka makumi gali ndarhu n’irhanu erhi aburha Yared: 16. Erhi aba amaburha Yared, Mahalalel ashub’ilama myaka magana munani na makumi asharhu, anakaburha abagala n’abali. 17. Akalamo ka Mahalaleel koshi kali ka myaka magana munani na makumi galimwenda n’irhanu, aga’ifa. 18. Yared aligwerhe myaka makumi galindarhu n’ibiri erhi aburha Enoch; 19. Erhi aba amaburha Enoch, Yared ashub’ilama myaka magana munani anakaburha abagala n’abali. 20. Akalamo ka Yared koshi kali ka myaka magana mwenda na makumi galindarhu n’ibiri: agali’ifa. 21. Enoch aligwerhe myaka makumi galindarhu n’irhanu erhi aburha Matusaleme. 22. Enoch alusibwa na Nnamahanga. Erhi aba amaburha Matusalem, Enoch ashub’ilama myaka magana asharhu anakaburha abagala n’abali. 23. Akalamo ka Enoch koshi kali ka myaka magana asharhu na na makumi galindarhu n’irhanu. 24. Bulya Enoch alilusibwe na Nyamuzinda, arhaciberaga eno igulu. Nyamuzinda amuheeka. 25. Metusaleme aligwerhe myaka igana na makumi galimunani na nda erhi aburha Lamek. 26. Erhi aba amaburha Lamek, Metusaleme ashub’ilama myaka magana nda na makumi galimunani n’ibiri, anakaburha abagala n’abali. 27. Akalamo ka Metusaleme koshi kali ka myaka magana mwenda na makumi galimwenda na mwenda, agal’ifa. 28. Lamek aligwerhe myaka igana na makumi galimunani n’ibiri erhi aburha omugala. 29. Amuyirika erya Nuhu, omu kuderha, erhi:  » Oyu ayishirhurhuliliza oku mukolo n’omurhamo gw’amaboko girhu, bulya Nyakasane aheherire obudaka ». 30. Erhi aba amaburha Nuhu, Lamek ashub’ilama myaka magana mwenda na makumi galimwenda n’irhanu, anakaburha abagala n’abali. 31. Akalamo ka Lamek koshi kali ka myaka magana nda na makumi galinda na nda, anagal’ifa. 32. Nuhu aligwerhe myaka magana arhanu erhi aburha Sem, Ham na Yafet.

OMURHONDERO VI 1.Erhi abantu barhangira baluga en’igulu, baburha abanyere, 2. bene Nyamuzinda babona oku abanyere b’abantu bali binja. Babayankamwo aba banalilonzize. 3. Lero Nyakasane aderha, erhi: « Omuuka gwani gurhacibere ensiku zoshi omu muntu, bulya ali mubiri n’akalamo kage kakola kaba ka myaka igana na makumi abiri ». 4.Ago mango, en’igulu yali abanenene-mikalarhu- ciru n’enyuma zaho, amango bene Nyamuzinda bakag’iyanka abanyere b’abantu, abo banyere bakaburha abana: zo zirya ntwali za mira, bantu b’irenge. 5. Nyakasane abona oku amabi g’abantu galuzire en’igulu na ngasi muhigo gwabali emurhima gwali gwa mabi gwone. 6. Nyakasane aciyunjuza ecarhumaga alema omuntu en’igulu anababala bwenene omu murhima gwage. 7. Nyakasane aderha, erhi: « Omu igulu nkola naholola abantu nalemaga; bone ensimba n’ebiyandala n’ebinyunyi by’emalunga, bulya namaciyunjuza ecarhumaga nabijira ». 8. Ci Nuhu yehe arhona emwa emwa Nyakasane. 9. Olwa Nuhu luno. Nuhu ali muntu mushinganyanya na mwirhonzi omu bantu b’amango gage analikulikire Nyakasane. 10. Nuhu aburha abagala: Set, Ham na Yafet. 11.Obwo igulu lyaliligomire embere za Nyakasane linayunjwire buminya. 12. Nyakasane alola igulu, abona oku lisherire, bulya ngasi muntu alihemusire omu lugendo lwage en’igulu. 13. Go mango Nyakasane abwizirage Nuhu, erhi: « Kuli nie, amango g’obuzinda bw’omuntu gahisire, bulya igulu lyasherire erhi bo barhuma, liyunjwire buminya. Niene nkolaga nabashaba haguma n’igulu. 14. Ocitulire obwarho bw’omurhi gw’enshebeyi; ogabe obwarho mwo rhuyumpa rhuyumpa, onabushige enungulu omu ndalala n’e mugongo. 15. Alaga oku wajira: obwarho bube na makano makumi asharhu ga buli, makumi arhanu ga bugali, makumi asharhu ga kadubwi. 16. Omu bwarho ohiremw’oburhungiri n’ah’ikano liguma enyanya oshwinje. Lunda luguma ohireyo omuhango gw’obwarho. Olujire mishonezo: ah’idoko, aha karhi n’aha nyanya. 17. Nkolaga narhuma ecihonzi, kwo kuderha mishi, en’igulu, ah’idako ly’amalunga, gashabe ngasi ciremwa ciyisa omuka; ebiri en’igulu bihererekere. 18. Cikwone wehe nakuha endagan. Wayish’ija omu bwarho mwen’abana bawe, mukawe, na baka bagala bawe. 19. Omu bizine byoshi, na ngasi mubiri, orhole bibiri bibiri bya ngasi lubero, obihugire omu bwarho, lyo biberana obuzine haguma nawe: hakaba kalume n’akakazi. 20Ebinyunyi kushimbana n’omwanya gwabyo, ebishwekwa kushimbana n’omwanya gwabyo, n’ebiyandala kushimbana n’omwanya gwabyo, bibiri bya ngasi buko bibere nawe, lyo bibeerana akalamo. Wehe orhole ngasi buko kalyo, olunde ofi hawe: byayishi ba biryo byawe na biryo by’ebizine ». Nuhu ashimba byoshi, nk’oku Nyakasane alimurhegesire, kwo anajizire.

OMURHONDERO VII 1. Nyakasane ashub’ibwira Nuhu, erhi:  » Jaga omu bwarho mwene omulala gwawe gwoshi, bulya nabwine oku oli mushinganyanya embere zani muli elira iburha. 2. Oku ngasi buko bwa nsimba ecire, orholemwo mahali nda, akalume n’akakazi kako; omu buko bw’ensimba zihumanya orhole ihasha liguma, akalume n’akakazi kako. 3. N’omu ngasi buko bwa mubinyunyi bicire, orhole mahasha nda, akaluke n’akakazi kako, lyo obuko burhag’ihera en’igulu. 4. Bulya enyuma lya nsiku nda, naniesa enkuba en’igulu nsiku makumi ani na madufu makumi ani; en’igulu naholola ngasi cizine najiraga ». 5. Nuhu ajira ebi Nyakasane ali amurhegesire byoshi. 6. Nuhu aligwerhe myaka magana ndarhu erhi ecihonzi ciyisha, go mishi okw’igulu. 7. Nuhu aja omu bwarho haguma n’abagala na mukage n’abali-kazi, lyo bayaka amishi g’ecihonzi. 8. Ensimba zicire n’ezihumaanya, ebinyunyi na ngasi biyandala oku idaho byadaha omu bwarho bibiri bibiri, 9 . akalume n’akakazi byoshina Nuhu, nk’oku Nyakasane analirhegesire Nuhu. 10. Erhi ensiku nda zihika, amishi g’ecihonzi gacihira oku idaho; 11. omu mwaka gwa magana ndarhu g’akalamo ka Nuhu, omu omwezi gwa kabiri, omu nsiku ikumi na nda z’omwezi, lwo n’olwo lusiku, amaliba g’ekuzimu gafununuka n’enshalalo z’emalunga zahulula. 12. Enkuba yania en’igulu nsiku makumi ani na madufu makumi ani. 13. Lwo n’olwo lusiku lyo Nuhu, boshi n’abagala Sem, Ham na Yafet, muka Nuhu, abali-kazi basharhu baka abagala: 14. boshi n’ebizine byoshi kushimbana n’obuko bwabyo, ensima kushimbana n’obuko bwazo, ebiyandala oku idaho kushimbana n’obuko bwabyo, ebibalala kushimbana n’obuko bwabyo, ebinyunyi byoshi na ngasi hibala, bajaga omu bwarho. 15. Kwo kujaga omu bwarho, babiri babiri ba ngasi ciyisa omuka. 16. Abo bayishaga kalume n’akakazi ba ngasi buko, bobadahire nk’oku Nyamuzinda anabarhegekaga. Nyakasane ayigala obwarho abaha omugongo. 17. Ecihonzi caba nsiku makumi ani, oku amishi gayushuka n’obwarho bwasokera enyanya z’izugulu. 18. Oku amishi galuga ganayushuka okw’igulu n’obwarho bwayereera oku mishi. 19. Amishi gaja gayushuka kulusha oku nyanya z’igulu ganabwika ngasi ntondo ndiri zinaba a’idako ly’amalunga.20. Amishi garhaluka entondo gabwikaga makoro ikumi n’arhanu. 21. Ngasi kazine kahererekera: ebigera okw’idaho, ebinyunyi, ebishwekwa, ensimba z’erubala, na ngasi bidudusa en’igulu na abantu boshi. 22. Kwo kuderha oku ngasi hyali en’igulu hyafa: ngasi biyisa omuka emazulu. 23. Ntyo kwo ebyali en’igulu byoshi byaholokaga: haguma n’abantu, ebishwekwa, ebiyandala n’ebinyunyi by’emalunga; byoshi byahirigirha en’igulu ci hasigala Nuhu yene na ngasi kali omu bwarho bonaye. 24. Amishi gayorha gabwikire igulu nsiku igana na makumi arhanu.

OMURHONDERO VIII 1. Nyamuzinda akengeera Nuhu, ensimba n’ebishwekwa byali bo naye omu bwarho. Nyamuzinda ageza empusi oku igulu, ntyo amishi gahonooka.2. Amaliba g’ekuzimu n’enshalalo z’emalunga byayigalwa; n’enkuba yayimanzibwa emalunga; 3. amishi gaja gayonda bunyi bunyi, gagana erhi kugera nsiku igana na makumi arhanu. 4. Omu mwezi gwa kalinda omu nsiku ikumi na nda z’omwezi, obwarho bwadekerera oku ntondo Ararat. 5. amishi gaja gayonda gaja gayonda bunyi bunyi kuhika mwezi gw’ikumi. Omu mwezi gw’ikumi, olusiku lurhanzi lw’omwezi orhurhwerhwe rhw’entondo rhwaboneka. 6. Erhi hagera nsiku makumi ani, Nuhu ayigula ilolero ly’obwarho alijizire omu bwarho anahulusa hungwe mpu aj’ilola erhi amishi gakazire. 7. Hungwe ahuluka ci akaja eyi n’eyi alinda oku amishi gakala okw’igulu. 8. Lero Nuhu ahulusa enguuku mpu alole erhi amishi gakazire okw’idaho; 9. ci wanguuku erhi abona arhabwini aha ahira obula bw’lushando, ashubira omu bwarho, bulya amishi gaciri okw’igulu. Nhu alambula okuboko, ayigwarha anashub’iyidahya omu bwarho hofi naye. 10. Alinda zindi nda, ashub’ihulusa eguuku omu bwarho, 11. enguuku yamushubirakwo bijingo, abona ekola edwirhe ehishami hy’omuzetuni omu mulomo. Nuhu ayumva oku amishi gaganyire okw’igulu. 12. Ashub’ilinda zindi nsiku nda, ashub’ilika enguuku egenda: erhacigalukaga aha ali. 13. Omu mwaka gwa magana ndarhu na muguma y’akalamo ka Nuhu, omu mwezi gwa burhanzi, omu lusiku lurhanzi ly’omwezi, amishi gali gamgana ekw’igulu; Nuhu akula omufuniko gw’obwarho, abona oku obululi b’igulu bwakazirekwo amishi. 14. Omu mwezi gwa kabiri, omu nsiku makumi abiri na nda igulu lyoshi lyakala. 15. Nyamuzinda arhegeka Nuhu, erhi: « Huluka omu bwarho mwena mukawe, bagala bawe na bali-kazi bawe haguma nawe. 17. Ensimba za ngasi lubero muli mweshi, orunyunyi, ebishwekwa na ngasi biyandala bina dudusa okw’igulu, obihuluse haguma nawe, lyo bihasha okulumiira igulu, biyololoke biluge hoshi. » 18. Nuhu ahuluka n’abagala, na mkage, n’abali-kazi. 19. Ebizine byoshi na ngasi bishwekwa n’orhunyunyi rhwoshin’ebiyandala binadudusa oku igulu kushimbana n’obuko bwabyo, byahuluka omu bwarho. 20. Go mango Nuhu ayubasirage oluherero lwa Nyakasane; arhola ngasi buko bwa nsimba ecire na ngasi rhunyunyi rhucire, arhuula embagwa z’okusingonola oku luherero. 21. Nyakasane abayiza hirya hibayo hinja anacigerereza, erhi: « Ntakaciheherera igulu bundi erhi muntu orhuma, bulya irala lyage liba liyerekire amabi kurhenga emuhimbo, ntakacishangula bundi ebizine nk’oku nzind’ijira. Oku igulu licihaba, okumiira/kurhwera n’okusaruula, emboho n’idurhu, ecanda n’enpondo, obudufu n’omushi, birhakacihusa kubaho ».

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion /  Changer )

Photo Google+

Vous commentez à l'aide de votre compte Google+. Déconnexion /  Changer )

Image Twitter

Vous commentez à l'aide de votre compte Twitter. Déconnexion /  Changer )

Photo Facebook

Vous commentez à l'aide de votre compte Facebook. Déconnexion /  Changer )

Connexion à %s