LES LANGUES DÉFORMENT LES NOMS EMPRUNTÉS AUX AUTRES ….
Endimi zisôma oku mazîno g’emahanga. Omu mashi kwa lwiganyo: André mpu NDRE ; Albert mpu LUBERI; Athanase mpu TANAZI,; shakulwe Rusinga akagiderha Berckmans mpu BALUKOMANGA. Co cirhuma kurhenga oku lulimi kuja oku lundi orhasomeragwa. Mulume muguma arhenga e Walungu, ah’okuderha oku ngasi muntu ageze Titre foncier ahamwage, waderhaga, erhi: « Ngasi muntu ageze NVOROVONZE ahamwage ». Ahoo muyishikambwira kurhi amazino rhwagayegereza ecihebraniya, garhengagamwo kulusha okugashwekera oku nfarasè.

Bulya ecigereki cirhajira herufi h n’enfarasè enakamira H, n’obwo ecihebraniya cohe vigwerhe H kasharhu: Hé, Het, Kaf orhalimwo nukta; cigwerhe n’eherufi ziderherwa ebiraka: Alef na Aïn, mazîno manji rhwashimbirekwo ecigereki n’enfarasè n’obwo rhwehe omu mashi herufi H ahêra omwana ibêre. Nyiganyo nsungunu:
Sidekyahu mpu Sedekiasi
Amaziyahu mpu Amaziyasi
Yoshiyahu mpu Yoziasi
Yehoshafat mpu Yozafati
Ahaz mpu Akaz
Menashè mpu Manasè
Azariyahu mpu Azariasi
Hana mpu Ana
Uziyahu mpu Oziasi

Rhwaciyushûla rhukamanya bici ngasi izîno lidesire. Lwiganyo
Hananiyahu erhi Hananyahu kuli kuderha LUKOGO erhi NSHOKANO ya Nyakasane. Bo bala bana rhuderha omu mashi mpu NSHOBOLE, NSHOKANO, n’omu ciswahili mpu NEEMA.