Soumis à qui? A Dieu et à l’autorité

Olub. 6,19; Emib. 3,20; 26, 57-58; 1 Engan. 6, 47

Ebiryo bicire n’ebiryo bihumânya

Olushika 14

1 Mwoyo muli bana na Nyamubâho, Nyamuzinda winyu. Murhahîra mukashâkwa nisi erhi okumômwa ebisike nka hali ofire. ² Bulya woyo oli lubaga lwarhûzirwe Nyamubâho, Nyamuzinda wawe, na Nyamubâho àcikwîshozire omu gandi mashanja goshi gaba hanôla igulu, mpu obe ishanja lyage.

3 Orhahîraga okulya akantu k’okushologosa. ⁴ Alaga ebintu n’ensimba ndibwa: enkafu, ecibuzi n’empene, ⁵enshagarhi, akashafu, empongo, akasa n’ensunu, empovu n’empene y’emuzirhu. 6 Wanalya ngasi cintu erhi nsimba ejira ensenyi mberemwo ebe erhi kuvûgusa evùgusa. ⁷ Cikwone, omu bintu bivûgusa n’omu bintu bijira ensenyi mberemwo, murhahiramukalya ngasi bûko bwa ngamiya n’obw’omurhonè. Ezo ozilole nka nsimba zihumânya. 8 Engulube nayo ejira ensenyi mberemwo ci kwone erhavûgusa: oyilole nka ya kuhumânya. Orhakalya enyama zazo orhakanahuma oku mirhumba yazo.

9 Omu nsimba z’omu mîshi, zo mwakalya ezi: ngasi ezijira emishugi y’emugongo n’enjula, ezo mwanazirya. ¹⁰ Ci ezirhajira mishugi y’emugongo zirhanajira njula murhâkazirya; ezo mukazizilola nka zakuhumànya.

¹¹ Mwanalya ngasi kanyunyi kacire. ¹²Alagi ebinyunyi murhakalya: ikozi, cigukuma,  cunjunja,  13  akadûrha,  ecihimbi  na  ngasi  bûko  nyûnda   bwoshi, 14 obûko cihungu bwoshi, 15 kanga, kahene, nyamulobo, na ngasi bûko lubaka, 16 cirifufu, hunira na kaduba mahiri, 17 hajawa, enkongoro n’emimâna, 18 lubondo n’obûko bwage, hangali n’omutulama. 19 Ngasi rhusimba rhwa mashala mukazilolarho nka rhwakuhumânya, murhankalyarho. 20 Mwanahashirya ngasi kanyunyi kacire. 21 Murhankalya enyama z’omufîra. Wanayiha ecigolo ciri aha mwawe ciyirye nisi erhi oyigulize ow’embuga, bulya wehe oli lubaga lwarhûzirwe Nyamubâho, Nyamuzinda wawe. Orhahîraga okayendera omwanahene omu mahenehene ga nina. 

Entûlo ya ngasi mwaka

22 Ngasi mwaka, kwanakwanana orhôle ecihimbi ca kali ikumi c’oku myaka yawe, eryala eyezire enarhenzire omu mashwa gawe. ²³ n’omu masu ga Nyamubâbo, Nyamuzinda wawe, halya hantu ânabe acishozire mpu abêzeho izîno lyage, wanaliraho ecihimbi ca kali ikumi c’engano yawe, ec’erivayi lyawe n’eca amavurha gawe, olubere lw’ebintu byawe binênene n’ebiyinyi ntyo, wanayiga okukaziyôrha orhinya Nyamubâho, Nyamuzinda wawe.

24 Erhi enjira yakakukulihira bwenêne, erhi wakaba orhahashirihisa entûlo ebwa kuba ahantu Nyamubâho àcishozire mpu abêzaho izîno lyage hali kuli n’emwawe, amango Nyamubâho, Nyamuzinda wawe aba amakugisha, ²⁵ erya myaka wanayihingana nsaranga, zirya nsaranga onazisêgeze omu nfune zawe, onaje halya hantu Nyamubâho, Nyamuzinda wawe acîshozire; 26 ohikaho wanakaba zirya nsaranga, ozihîngane ngasi kantu onalonzize, bintu binênene erhi binyinyi, divayi erhi ngasi mamvu gahîre, ngasi ehi onayumvirhe omurhima gusîmire. Wanalira mulya masu ga Nyamubâho, Nyamuzinda wawe, osîme woyo n’enyumpa yawe. ²⁷ Orhayibagiraga omuleviti ôli omu mirhundu yawe, bulyalya arhagwerhi mwanya arhanagwerhi kashambala haguma nawe.

Entûlo ya ngasi myaka isharhn

28 Enyuma lya myaka isharhu, wanarhôla ebihimbi bya kali ikumi by’e myaka wamasarûla muli ogu mwaka gwa kasharhu byoshi, wanage­ndibidêkereza ebwa mihango yawe. 29 Okubundi obwo, hanajira abayîsh’irya: Omuleviti (bulya arhajira mwanya arhanajira kashambala haguma nawe), ecigolo, enfunzi n’omukana w’oku mwinyu, balya banayîgurhe. Na ntyo, Nyamubâho, Nyamuzinda wawe àkugisha agishe na ngasi mukolo enfune zawe zakanarhangira.